/8/
EXERCITATIO II
Deus quid sit.
Variis iisque caecis tanquam andabatarum
more veteres Philosophi decertarunt
opinionibus. Thales voluit Deum
esse aquam. Anaximenes, aëra. Crotoniates,
Solem, Lunam et Sidera. Parmenides, informem
coeli coronam. Empedocles, quatuor
naturas. Democritus, imagines. Socrates,
Plato et Xenophon, coelum ac Solem.
Xenocrates, haec et quinque stellas erraticas
nec non unum quid compositum ex omnibus
fixis. Heraclides, coelum et terram. Horum
Philosophorum iudicium non insectabor;
non enim dignum est opera nostra. Sequar
potius saluberrimum consilium divini
Praeceptoris, qui, in tertio De partibus, text. 4.,
et in primo Topicorum, text. 9., ita scripsit: «Sapientis
officium non esse stultas pertinacias
insectari». Unica hae autem omnes opiniones
corruunt ratione: finita namque illa cuncta
cum sint, necessario ab alio dependent; non
igitur Deus sunt. Quippe Deus est entium
omnium primus.
Quaeris a me quid Deus sit? Si scirem,
Deus essem; nam Deum nemo novit, nec